चितवनको गरिमामय विविधता र समग्रताको प्रतिविम्वको रूपमा ख्याति प्राप्त गर्न सफल चितवन महोत्सव वि.सं. २०५३ सालदेखि दुई दुई वर्षको अन्तरालमा आयोजना गरिदै आएको छ । विगतमा नै जिल्लाको समग्र आर्थिक, सामाजिक, सांस्कृतिक, पर्यटकीय जादि विविध क्षेत्रको विकास एवम् संरक्षण, सम्बर्द्धनमा समेत महत्त्वपूर्ण योगदान पुर्याउने मुख्य उद्देश्य अनुरूप यस पटक पन्ध्रौं श्रृंखला चितवन महोत्सव २०८१ को रूपमा विभिन्न कार्यक्रमहरू समावेश गरी आयोजना गरिने छ । उद्योग व्यवसायको प्रवर्द्धन तथा समग्र चितवन जिल्लाको कृषि, पर्यटन, शिक्षा, स्वास्थ्य आदि विविध क्षेत्रको विकास निर्माणमा अग्रपंक्तिमा रहि साझेदारी गर्दै यस पटक उद्योग वाणिज्य संघ-चितवनले आफ्‌नो आयोजना तथा भरतपुर महानगरपालिका र जिल्ला समन्वय समिति, चितवनको मुख्य प्रवर्द्धनमा चितवन महोत्सव-२०८१ यही पौष २५ गतेदेखि माघ १० गतेसम्म सञ्चालन हुँदैछ । यस महत्त्वपूर्ण अवसरमा चितवन जिल्ला एवम् देशकै औद्योगिक, व्यावसायिक प्रतिष्ठानका साथै आर्थिक विकासका हरेक क्षेत्रका गतिविधिहरू प्रदर्शित हुने कार्यक्रम रहेको छ । चितवन मुलुकको ७८ औं जिल्लाको रूपमा चिनिन्छ । गणराज्यका ७७ वटै जिल्लाका मानिसहरूको बसोवास रहेको चितवनमा जातीय, भाषिक, भौगोलिक एवम् सांस्कृतिक विविधता छ । यो विविधतामा पनि एकता, सहिष्णुता, सद्भाव, जागृति र युगीन विकासका अनुपम उदाहरणहरू देख्न पाईन्छ । यहाँ हिमाली तथा पहाडी दुर्गमता र भित्री मधेशीय समताको अपूर्व संगम छ भने कृषि, शिक्षा, स्वास्थ्य, पर्यटन आदिको अनौठो संयोजन पनि छ । यहाँ विश्वकै दुर्लभ एकसिंगे गैंडा, गोही जस्ता वन्यजन्तु तथा विभिन्न रङ्गीचङ्गी चराचुरुङ्गीहरूको सुरक्षित वासस्थान अर्थात् राष्ट्रिय निकुञ्ज अवस्थित छ । अतः चितवन विदेशी पर्यटकहरूको सममोहक स्थानका रूपमा समेत चिरपरिचित रहेको छ । सदाझै यसपटक पनि स्थानीय, राष्ट्रिय तथा अन्तर्राष्ट्रिय औद्योगिक एवम् उपभोग्य वस्तुहरूको प्रदर्शनीका साथै चितवनका विविध लोकसंस्कृक्ति, कला, साहित्य, शिक्षा, स्वास्थ्य आदि क्षेत्रको प्रवर्द्धनात्मक झलक र झाँकीहरू प्रदर्शित हुने कार्यक्रमको निरन्तरता रहने छ ।